專題篇- 東坪洲黃仔

除左蒲台隻黑狗之外,東坪洲黃仔做狗領隊做得出色,我都見過佢2次.聽到以下消息,真係唔開心.
位於香港東北、猶如天涯海角嘅東平洲，除咗最為人熟悉嘅地質公園，仲有喺島上土生土長，今年 20歲嘅唐狗黃仔（又名金仔）。有好多訪客識得黃仔，皆因黃仔當正自己係島主，每逢假日有訪客坐船去東平洲遊山玩水，黃仔都會喺碼頭迎賓，仲會免費充當導遊，帶班遊客四圍睇石。仲驚遊客行錯路，不時陪遊客走足全程，仲去埋碼頭送船。
不過，最近復活節假期，有重遊東平洲嘅市民發覺唔見咗黃仔，打聽先知道黃仔原來骨癌惡化，送咗去愛護動物協會。愛協一直跟進黃仔個案，去過八次東平洲嘅波比話，黃仔從未離開過東平洲，陪佢坐船離開東平洲嗰陣，覺得黃仔好驚，要波比一直喺甲板陪住佢。
愛協早兩日帶八方探黃仔，見到佢左邊面個水瘤垂咗落嚟，影響到左眼滿佈血絲。佢攤咗喺個籠裏面，睇落有神冇氣，同網上睇到佢喺碼頭迎接訪客個樣完全係兩個樣。
其實早喺 08年愛協已收到報料，話黃仔塊面有個腫瘤，派員到島上檢查後，認為只係水瘤，唔係惡性瘤。當時考慮到黃仔年紀唔細，又從未離開過東平洲，唔想黃仔舟車勞頓出市區做手術。
愛協檢核部總監何子棠話，黃仔唔係流浪狗，原先居住喺島上嘅村長毛伯係佢主人，同樣因年紀大搬走咗，毛伯近年去世。生前將黃仔同佢另一隻狗兄弟肥黃，簽定張授權書畀愛協，一旦阿黃兩兄弟有絕症，唔想佢哋咁辛苦，可以人道毀滅。

喺東平洲開士多嘅鄒小姐帶埋個女去探黃仔。佢話黃仔睇見佢哋好開心，食晒帶去嘅罐頭。黃仔仲同佢哋玩咗幾個鐘。佢話好唔捨得黃仔，真係好想帶佢返東平洲。不過獸醫話以黃仔嘅病情，好難再返家鄉。
愛協首席獸醫桂珍 Jane Gray話，年老嘅黃仔最大問題唔係個水瘤，而係骨癌。睇見佢痛到唔想食嘢，只能盡量同佢打止痛針。 Jane亦係愛狗之人，送別過愛犬離世，佢話黃仔年齡咁大，仲患埋癌症，隨時終老，但係黃仔已年逾 20歲，相當於人類 100歲，算係長命百歲。
Source:
http://hk.apple.nextmedia.com/template/apple/art_main.php?iss_id=20110430&sec_id=4104&subsec_id=15333&art_id=15212997&cat_id=45&coln_id=20