行山萬"李"(375)-禾徑山, 紅花嶺, 紅花寨, 蓮麻坑

路線 :禾徑山, 紅花嶺, 紅花寨, 蓮麻坑(折返)
需時 : 5.5小時
里數 : 13-14KM
難度 : ***
天氣 : 溫度16-19C,濕度35-65%,部分時間有陽光(18/12/10)
主要交通 : MTR粉嶺,轉九巴78K大塘湖下車
特點 : 超越沙頭角邊境到蓮麻坑禁區
李"想點睇 :
1.今次係我第1次行礦洞, 蓮麻坑洞中有洞, 有鐘乳石, 有蝙蝠, 真係好靚.
2.蓮麻坑呢個地方,係我行山以來最自然地方,入夜後,我好似仲聽到野豬聲同豹貓叫聲.呢一帶將成為第25個郊野公園,希望環境唔好被破壞.
3.蓮麻坑故事
蓮麻坑（Lin Ma Hang）喺香港新界邊境禁區，係一條村，叫蓮麻坑村，亦村附近一帶嘅代表。蓮麻坑地方行政上歸北區，介乎沙頭角同打鼓嶺之間。因為係禁區嘅關係，少人入村，自然風貌重保存得唔錯。
蓮麻坑得條叫蓮麻坑路出村。北便好近深圳河，過咗河就係深圳。
蓮麻坑舊時鉛礦，因為寶安土話叫鉛礦石做「蓮」，所以叫蓮麻坑。山上便廢礦有個蝙蝠洞，係香港重要蝙蝠棲息地之一，所以香港政府列佢做具特殊科學價值地點（SSSI）。
蓮麻坑村家下住唔過百人。不過喺全盛時期，呢度住過千名村民。村民絕大部份姓葉，係祖籍廣東陸豐嘅客家人，亦都少數姓劉、官同冼。
蓮麻坑嘅礦山有鉛、鋅、黃鐵礦、黃銅礦等。1930年代末，英國人響蓮麻坑礦山採鉛礦。二次世界大戰期間，日本佔領香港，喺1942年起繼續採礦，用來應付太平洋戰爭。1943年夏天，三個蓮麻坑後生仔，葉維里、葉盤嬌同葉煌青，想炸礦山，等日本無用。不過佢哋爆破失敗，畀新界沙頭角嘅日本憲兵捉咗，打咗一身，畀人折磨，最後放咗。葉維里後尾入咗廣東人民抗日游擊隊，重同沙頭角民兵常備隊攻打蓮麻坑礦山，不過日軍猛烈抵抗，礦山攻唔落。1944年底，當時任東江縱隊偵察員嘅葉維里，再打礦山，呢次行動有200游擊隊員同埋100民工配合，蓮麻坑礦山終於炸爛咗。
家下蓮麻坑礦山上便，重有好多個通風井，不過雜草叢生，井口難察。所以封咗通風井一帶，以免有人墮井。
做過生態調查，話蓮麻坑嘅風水林同次生林係「生態熱點」，森林中搵到橙頭地鶇（Orange-headed ground thrush）、赤麂、果子狸等。次生林中裏便，亦都第一次喺香港境內搵到麥氏桫欏（Gymnosphaera metteniana）。咁即係低地河澗嘅淡水生境，仍然健全。此外，蓮麻坑鉛礦山上有個蝙蝠洞，係香港重要蝙蝠棲息地之一，政府列佢做具特殊科學價值地點（SSSI）。
蓮麻坑生態家下有危機，好似東部走廊計劃、防洪工程、薇甘菊入侵、同非法捕獵野生動物等。
Source:
http://zh-yue.wikipedia.org/wiki/%E8%93%AE%E9%BA%BB%E5%9D%91